Mga Awit 12

Panalangin Upang Tulungan ng Diyos¹O Yahweh, kami sana'y iligtas mo! Pagkat wala na ngayong mabuting tao, wala nang taong tapat at totoo. ²Nagsisinungaling silang lahat sa isa't isa, nagkukunwari at nagdadayaan sila. ³Patigilin mo, Yahweh, ang madaldal na dila, at sarhan ang bibig ng hambog magsalita; ⁴silang laging nagsasabi, “Kami'y magsasalita ng nais namin; at sa gusto nami'y walang makakapigil!” ⁵“Darating na ako,” sabi ni Yahweh, “Upang saklolohan ang mga inaapi. Sa pinag-uusig na walang magkupkop, hangad nilang tulong ay ipagkakaloob!” ⁶Ang mga pangako ni Yahweh ay maaasahan, ang katulad nila'y pilak na lantay; tinunaw sa hurnong hinukay, pitong beses na pinadalisay. ⁷Kami, Yahweh, ay lagi mong ingatan, sa ganitong mga tao ay huwag pabayaan; ⁸Ang masasamang tao'y nasa lahat ng lugar, ang mga gawang liko ay ikinararangal!