Mga Awit 30

Panalangin ng Pagpapasalamat¹Pinupuri kita, Yahweh, pagkat ako'y iyong iniligtas, mga kaaway ko'y di mo hinayaang magmataas. ²Sa iyo, Yahweh, aking Diyos, ako'y dumaing, at ako nama'y iyong pinagaling. ³Hinango mo ako mula sa libingan, at mula sa hukay, ako'y muli mong binuhay. ⁴Purihin si Yahweh, siya'y inyong awitan, ninyong bayang hinirang, siya ay pasalamatan, pasalamatan ninyo ang banal niyang pangalan! ⁵Ang kanyang galit, ito'y panandalian, ngunit panghabang-buhay ang kanyang kabutihan. Sa buong magdamag, luha ma'y pumatak, pagsapit ng umaga, kapalit ay galak. ⁶Sinabi ko sa sarili pagkat ako'y panatag, “Kailanma'y hindi ako matitinag.” ⁷Kay buti mo, Yahweh, ako'y iyong iningatan, tulad sa isang muog sa kabundukan. Ngunit natakot ako, nang ako'y iyong iwan. ⁸Sa iyo, Yahweh, ako'y nanawagan, nagsumamo na ako ay tulungan: ⁹“Anong halaga pa kung ako'y mamamatay? Anong pakinabang kung malibing sa hukay? Makakapagpuri ba ang mga walang buhay? Maipapahayag ba nila ang iyong katapatan? ¹⁰Pakinggan mo ako, Yahweh, at kahabagan, O Yahweh, ako po sana'y tulungan!” ¹¹Pinawi mo itong aking kalungkutan, pinalitan mo ng sayaw ng kagalakan! Pagluluksa ko ay iyong inalis, kaligayahan ang iyong ipinalit. ¹²Aawit sa iyo ng papuri at hindi ako tatahimik, O Yahweh, aking Diyos, pasasalamat ko'y walang patid.