Mga Awit 29

Ang Tinig ni Yahweh sa Gitna ng Unos¹Purihin ninyo si Yahweh, mga nilikha sa kalangitan, kilalanin ang kanyang lakas at kanyang kaluwalhatian. ²Purihin ang kanyang maluwalhating pangalan, sambahin si Yahweh sa banal na kaayusan. ³Tinig ni Yahweh'y naririnig sa ibabaw ng dagat, ang dakilang Diyos ay nagpapakidlat, umaalingawngaw at naririnig ng lahat. ⁴Tinig ni Yahweh'y makapangyarihan, at punung-puno ng kadakilaan. ⁵Maging mga punong sedar ng Lebanon, sa tinig ni Yahweh, mawawasak ang mga iyon. ⁶Parang guyang pinalulundag niya ang mga bundok ng Lebanon, parang torong pinalulukso niya ang Bundok Hermon. ⁷Dahil sa tinig ni Yahweh, kidlat ay gumuguhit. ⁸Kapag siya'y nagsalita, disyerto'y nayayanig; inuuga niya pati ang ilang ng Kades. ⁹Sa tinig ni Yahweh, mga usa'y napapaanak, at nakakalbo pati ang mga gubat, lahat ng nasa Templo'y sumisigaw, “Ang Diyos ay papurihan!” ¹⁰Si Yahweh'y naghahari sa mga kalaliman, nakaupo sa trono, bilang hari kailanman. ¹¹Si Yahweh ang nagbibigay-lakas sa kanyang bayan, at pinagpapala sila ng mapayapang buhay.