Mga Awit 51

Panalangin ng Paghingi ng Kapatawaran¹Ako'y kaawaan, O mahal kong Diyos, sang-ayon sa iyong kagandahang-loob; mga kasalanan ko'y iyong pawiin, ayon din sa iyong pag-ibig sa akin! ²Linisin mo sana ang aking karumhan, at patawarin mo'ng aking kasalanan! ³Mga pagkakasala ko'y kinikilala, di ko malilimutan, laging alaala. ⁴Sa iyo lang ako nagkasalang tunay, at ang ginawa ko'y di mo kinalugdan; kaya may katuwiran ka na ako'y hatulan, marapat na ako'y iyong parusahan. ⁵Ako'y masama na buhat nang isilang, makasalanan na nang ako'y iluwal. ⁶Nais mo sa aki'y isang pusong tapat; puspusin mo ako ng dunong mong wagas. ⁷Ako ay linisin, sala ko'y hugasan at ako'y puputi nang lubus-lubusan. ⁸Sa galak at tuwa ako ay puspusin; butong nanghihina'y muling palakasin. ⁹Ang kasalanan ko'y iyo nang limutin, lahat kong nagawang masama'y pawiin. ¹⁰Isang pusong tapat sa aki'y likhain, bigyan mo, O Diyos, ng bagong damdamin. ¹¹Sa iyong harapa'y huwag akong alisin; iyong banal na Espiritu'y paghariin. ¹²Ang galak na dulot ng iyong pagliligtas, ibalik at ako po'y gawin mong tapat. ¹³Kung magkagayon na, aking tuturuang sa iyo lumapit ang makasalanan. ¹⁴Ingatan mo ako, Tagapagligtas ko at aking ihahayag ang pagliligtas mo. ¹⁵Tulungan mo akong makapagsalita, at pupurihin ka sa gitna ng madla. ¹⁶Hindi mo na nais ang mga handog; di ka nalulugod, sa haing sinunog; ¹⁷ang handog ko, O Diyos, na karapat-dapat ay ang pakumbaba't pusong mapagtapat. ¹⁸Iyong kahabagan, O Diyos, ang Zion; at ang Jerusalem ay muling ibangon. ¹⁹At kung magkagayon, ang handog na haing dala sa dambana, torong susunugin, malugod na ito'y iyong tatanggapin.